暗 湧

原本係要打壹件事嘅，但係今晚又經歷咗壹D野，實在不吐不快，所以無論幾眼訓，我都要堅持打完呢篇blog...

好，入正題。

首先，就係頭先咧約咗某人，一位我朝思暮想都想見嘅人。好喇，終於比我見到佢，但係結果咧？我仲以為我會好興奮好激動，但結果係冇架。一切都好平靜，甚至乎有少少冷場，我都唔記得我成晚假笑咗幾多次。哈哈。可能之前我真嘅係諗多咗喇，又或者係捉錯用神喇。其實，真嘅係乜都冇，況且，仲令我明白有D野，攤凍咗就係攤凍咗，係好難熱得翻架喇。無所謂，我就當做了咗件心事咯。下一次見面，都唔知何年何月。如果你問我，遺唔遺憾？我梗係覺得遺憾，但係，我可以點？如今擺係我面前嘅都已經唔係以前果個佢，我仲駛留戀D乜野? 實在好討厭這種距離感。冇錯，可能大家表面上仲係冇咩點變，但係我可以好肯定咁話比你知，真係今時唔同往日，好多野都變質咗。算把喇阿Fur..

好。第二件事。好多人問我，點解會揀香港嘅？呢個問題，其實我都諗咗好耐。當然，一來係因為我個人喜歡香港呢個地方。但最近我先至真正參透，原來香港就彷如我生命中嘅一道曙光，帶我離開這烏雲密布的廢墟。其實去邊度都唔重要，重點係，我要離開！我要逃亡！實在冇眼再留喺度睇埋D廢柴，成個厲鬼纏身咁，係都冤魂不散！可能你會覺得我咁諗好自私，但係諗返曾幾何時當我好大方咁為大家著想果陣，佢地體恤過我嗎？到頭來佢地又唔係會覺得我咁樣做係理所當然嘅，係我應該嘅。所以，真係唔好怪我。至少先諗下，你又做得岩咩？答案呼之欲出。雖然我冇辦法話去香港一D都唔駛靠你，但起碼，我一定會以我自己親手爭取返黎嘅獎學金而感到無比自豪。要講嘅已經講咗，要做嘅亦已經做咗，我已經冇辦法再委屈我自己去認同同埋接受。睇黎，暫時行開陣未嘗不是一個好嘅方法，祝大家好過。19歲，真嘅係唔細喇。留學香港係我第一次為我自己嘅人生鋪出黎嘅一條路，前面係點我真係唔知，可能都免不了會迂迴曲折、崎嶇不平。但既然已經殺出一條血路，我相信呢個信念一定會帶領我繼續向前行。

睇得明嘅人自然會明白；睇唔明嘅人就算喇。